«iOs 11»-ին Հայերէն Ստեղնաշարը

Տարիներէ ի վեր Ափըլահայերը կը սպասեն որ իրենց հեռաձայնն ալ հայերէն ստեղնաշար մը ունենայ:
Բազմիցս լեզուներու ստեղնաշարեր գոյութիւն ունեցած են «iOs»-ի տարիներու թարմացումներուն մէջ, սակայն հայերէնը միշտ ալ բացակայ եղած է:

Ինչու՞: Չեմ գիտեր: Թերեւս ալ գիտեմ:

Քանի մը տարի առաջ, Հայերէնով գրելու համար պարտաւոր էիր հայերէն ստեղնաշարի ծրագիր մը ներբեռնել, հոն գրել գրելիքդ, ետքը «copy-paste» ընել: Երկար-բարակ գործ:

«iOs 8»-էն ետք գործը դիւրացաւ քիչ մը: Այս թարմացումը կ'արտօնէր ստեղնաշարեր աւելցնես ցանկիդ մէջ այլ ծրագիրներու միջոցաւ: Այսինքն՝ ա՛լ պէտք չունիս «copy-paste» ընելու, ուղղակի կը գրես ուր որ պիտի գրես: Լաւ ծրագիրներէն մէկը «HayTar»-ն էր: Ունէր Արեւմտահայերէն «ARM Western» (ԽՎԷՐԴԵ), «ARM Phonetic» (ՔՈԵՌՏԸ), եւ «ARM Typewriter» (ՃՓԲՍՄՈ) տարբերակները, եւ քանի մը բան փոխելու հնարաւորութիւն կուտար, օրինակ.- «Ւ» տարը փոխարինել «ՈՒ»ով, կամ՝ հակառակը:

Ամիս մը առաջ՝ «iOs»-ի վերջին թարմացումին մէջ, տեսանք Հայերէն ստեղնաշար կայ: Հրճուա՜նք: Շուտով հանեցի միւս ծրագիրները, որովհետեւ անպէտք էին այլեւս: Վստահ կատարեալ բան մը չէր, նոր իջած է: Քանի մը բան նշեմ:

1- Ի տարբերութիւն այլ ծրագիրներու, այս ստեղնաշարը մէկ տարբերակ ունի՝ Արեւմտահայերէնն է (ԽՎԷՐԴԵ)

2- Ստեղնաշարին անունը գրուած է «հայերեն» եւ ոչ «հայերէն»: Արդի ուղղագրութեամբ է, տեսնողը արեւելահայերէնի հոտ կ'առնէ:

3- Ստեղնաշարին մէջ «Go»-ն «գնալ» թարգմանուած է: Դարձեալ Արեւելահայերէն է:

4- Ստորակէտ մը դնելու համար պէտք է 3 էջ փոխես:

Մէկ խօսքով՝ Արեւմտաւելաւհայերէն ստեղնաշար մըն է, բայց նշուած կէտերը շտկելը շատ դիւրին է: Կարեւորը հիմա հայերէն ստեղնաշար կայ: Կը մնայ ունենանք սրբագրիչ մը, որ ըստ իս, շա՜տ բան կրնայ փոխել համացանցի վրայ հայատառ գրելու գծով:

Ստեղնաշարին Գլխագիր տառերը

Ստեղնաշարին առաջին էջը

երկրորդ էջը

երրորդ էջը